Terra ceibe na espranza nembramos de xionllos
e nembramos ergueitos debruzados na herba
deica a aba do mar
arelamos a loia que devén a cotío
na luzada do abrente a terra non é certo
De diante do cabouco nun queixume sen trégola
agromecen as flairas co lecer dos degaros
malia o eixo furado da moa estarabouza
a dor do derradeiro xiro interminabre
No relanzo do berce a carón das silveiras
xogan orfos os nenos coas xiadas quiobras
Os fillos de Breogán na lareira na artesa
atópanse coa cinza de outas verbas luidas
coas códeas mofadas da broa da costume
co fondo chamamento pra o novo desarraigo
Rota eixada cravouse no cerne dos menceres
sulagouse e perdeuse nun silenzo de augamas
Inda o tempo das nais briza berces valeiros
i envellece no loito das ardigas tafegas
acougando no armario as mazáns recendentes
que uns beizos degoraran anovado recordo
Atendo a terra xira no caos é o meu desterro
e o pulo de xurdir a mais ampra eisistencia
no amor da identidade a eito estremorece
a nova servidume Breogán do teu pobo
Morte vouga agoiramos de xionllos na espranza
e agoiramos ergueitos debruzados na herba
a cabalo da anguria
agoiramos o ouvido tremelido do lobo
nos ruibéns do solpor a morte non é certo
Morte ceibe nembramos terra nosa na espranza
cando a Galicia esbullan Breogán o teu nome
e nembramos ergueitos deica a aba do mar
somentes terra alléa debece a liberdade
Verme a xermola a teima apodrecen no froito
a ardesía laboura do arfado xurdimento
Desfollamos na chaira os derradeiros sinos
cando a Galicia esbullan Breogán o teu nome
e brilan as estrelas cingues os bois a terra
non é xa non é nosa
só a irmandade perdura deica os tempos vindeiros
Inda o tempo das nais briza berces valeiros
namentras voa a loia na luzada do abrente
Atendo a terra xira no caos é o meu desterro
e o pulo de xurdir a eito estremorece
coa nova servidume Breogón do teu pobo
a loaira dos Eoas a mais ampra eisistencia
Atende o pobo os sinos da nova servidume
coa loaira das fouces e coa eixada perdidas
cando o estar é unha ausencia doendo na nembranza
deica os tempos vindeiros só a irmandade perdura
Brila a fouce inda quente das raíces dos toxos
afroando furentes labaradas insones
mais logo esmoreceran nun éxodo de espellos
que o vento debalaba na xerfa dos ronseles
A carón das fogueiras lonxe a rente das noites
xogan orfos os nenos coas murchas referencias
Verme e xermola a teima para uns beizos sen culpa
que birtaron a lei do deporvir incerto
apodrecen no froito a ardesía laboura
dun novo rexurdir aos eidos treizoados
As fouces tremelidas nas mans do desacougo
asúan tempos vougos de anguria e desamparo
Irmáns de alléa morte nas insólitas rúas
saúdan desleirados ao perigo das verbas
cando as mans non se fan a iniciada costume
cando o estar é unha ausencia doendo na nembranza
Atendo a terra xira no caos é o meu desterro
coa nova servidume Breogán do teu pobo
cando enmoven os Eoas a loaira das fouces
deica os tempos vindeiros só a irmandade perdura
Inzade a rede o día da morte non é nosa
cunha anada de verbas pra o intre derradeiro
de pé xa non é certo na aba de alén mar
irmáns de alléa morte estivadan a tebra
