CANZÓNS

ÁGOA DE MUIÑO

Ágoa de muiño

seus rumores son,

fios cristaíños

da noite ao redor.

O seu agarimo

é de namorar

estreliñas núas

da noite noval.

Ágoa do muiño

faise soio voz

parada na noite:

pára, corazón!

OS SONOS DA TECELANA

Os sonos da tecelana

van pólo río

das mañans craras.

Van pólo río

e as manciñas amantes

son seu navío.

Son seu navío

na durmevela

do vaivén namorado

da tecedeira.

OS CANDIEIROS ALCENDEN

Os candieiros alcenden

páledas lumieiriñas;

pólo campo vizoso do ceo

teus sonos guían.

Aconchégate anxo

que xa é noite no campo.

Dúrmete nena

que xa o sapo na bouza

roe a noite pequena.