SORRISOS

MARIÑEIRO, MARIÑEIRIÑO

Mariñeiro, mariñeiriño

déixame pasar a ría

que perdín o meu vestido.

Rosa e xazmín,

non levarei agora

o que eu perdín.

Mariñeiro que tés amores

déixame ir na falúa

que estou vestida de frores.

Rosa e xazmín,

non levarei agora

o que eu perdín.

Mariñeiro que amores tés

déixame ir na falúa

que estou por amores núa.

Rosa e xazmín,

non levarei agora

o que eu perdín.

MAPOULADA, MAPOULA DO RÍO

Mapoulada mapoula do río

que mapoula é.

Quen alcende as escumas do frío

muiñeira é.

Quen marmura na lingoa do río

lavandeira é.

Quen pendura o seu sono de un fío

tecedeira é.

Mapoulada mapoula do río

miña noiva é.

TECE, TECE, TECELANA

Tece, tece, tecelana,

do liño a sua fror de orballo.

Duas pombiñas brancas

ten o que eu amo.

Han de ir voar.

Tece e tece, tecelana,

a fror de orballo do liño.

Duas pombiñas brancas

ten meu amigo.

Han de ir voar.

Tece, tece, tecelana,

a luz do orballo, o recendo da fror.

Duas pombiñas brancas

ten meu amor.

Han de ir voar.

Ten meu amor.

Ten o que eu amo.

Ten meu amigo.

Xa perdín o rumbo do fío.